Basha jep ultimatumin e fundit për Qeverinë 

Kryetari i Partisë Demokratike të Shqipërisë, Lulzim Basha, nga Kuvendi  i ka dhënë ultimatumin e fundit Qeverisë për të gjetur një zgjidhje politike përpara se, siç tha ai, populli të marrë në dorë fatin. 

“Është rasti i parafundit për t’i bërë thirrje ndërgjegjes së socialistëve të ndershëm t’i detyrojnë kukullat e krimit dhe oligarkisë që kanë mbushur këtë sallë që t’i thërrasin zërit të arsyes dhe t’i hapin rrugë një zgjidhjeje politike”, ka thënë Basha. 

Kreu i PD-së ka theksuar se në qershor nuk do të ketë hapje të negociave dhe përgjegjësi i vetëm për këtë është Rama. 

Ministri i Brendshëm, Sandër Lleshaj, i replikoi Bashës, duke i thënë se “kurrë nuk do të arrini, sa unë të drejtoj Ministrinë e Brendshme, të ketë viktima në bulevard dhe Shqipëria të marrë njollë të zezë që ju keni lënë personalisht”.