Sadiku ndërmjet Zvicrës dhe Gjermanisë

“Tani kam në dorë vetëm dy opsione: një në Gjermani në Bundesligën e parë dhe një këtu, në Zvicër, po në Kategorinë e parë"

Futbollisti i kombëtares shqiptare, Armando Sadikut, do të zgjedhë ndërmjet Superligës së Zvicrës dhe Bundesligës gjermane. 

Lajmin e ka konfirmuar vetë sulmuesi i deritashëm i Luganos, Armando Sadiku, për të përditshmen sportive ‘Panorama Sport’.

“Tani kam në dorë vetëm dy opsione: një në Gjermani në Bundesligën e parë dhe një këtu, në Zvicër, po në Kategorinë e parë. Kam folur me të dy drejtuesit e këtyre klubeve dhe brenda të mërkurës do të vendos përfundimisht se për cilën skuadër do firmos”, ka deklaruar ai.

Sulmuesi i Kombëtares ka bërë të ditur se gjatë kësaj vere ka pasur oferta të ndryshme nga ekipet angleze, italiane, rumune dhe meksikane, por i ka refuzuar ato.

Sadiku ka zbuluar se kishte oferta edhe nga Fiorentina, Livorno, Genoa e Verona, por i ka dështuar transferimi, pasi llogaritet si futbollist ekstrakomunitar, pasi ka vetëm pasaportën e Shqipërisë.

Sadiku është golashënuesi kryesor i skuadrës së tij sezonin e fundit, ka realizuar vitin e kaluar 19 gola në 27 ndeshje, duke qenë dhe “Këpuca e Artë” e Divizionit të dytë helvet.