Kosovarët, numër 1 për kërkesa azili në Luksemburg

Me 99 kërkesa gjatë shtatë muajve të parë të vitit, kosovarët janë të parët. Pas tyre vijnë shtetasit e Bosnjës (58) ata të Malit të Zi (52), të Shqipërisë (44) dhe të Serbisë (30).

Gjatë muajit korrik në Luksemburg është shënuar një rënie e numrit të kërkesave të reja për azil. Gjithsej 106 azilkërkues janë paraqitur gjatë muajit në fjalë që është nën gjysmen e numrit të korrikut të vitit 2012, kur ishin 236.

Siç njofton gazeta “Luxemburger Tagblatt”, duke iu referuar të dhënave nga Ministria e Jashtme, gjatë shtatë  muajve të deritashëm të këtij viti kanë paraqitur 590 të huaj kërkesa për azil. Sa për krahasim: në 7 muajt e vitit 2012 ishin1438 të huaj që ishin paraqitur te autoritetet e Luksemburgut me kërkesën për azil.

Ndërkaq, sa i përket muajit korrik të këtij viti, me kërkesa azili vendin e parë e zënë kosovarët, të cilët kanë bërë 36 kërkesa të tilla. Në vendin e dytë vijnë malazezët me 15.

Është interesante se nga vendet në gjendje krize ose lufte si Siria, Egjipti, Tunizia ose Somalia gjatë korrikut ka pasur numra simbolikë azilkërkuesish, nga 4, 2 ose nga 1sish.

Marrë në tërësi në shtatë muajt e parë të këtij viti përqindjen më të lartë të azilkërkuesve në Luksemburg e përbëjnë shetasit e vendeve të Ballkanit (47.9%). Edhe këtu kosovarët janë të parët me 99 kërkesa për azil. Pas tyre vijnë shtetasit e Bosnjës (58) ata të Malit të Zi (52), të Shqipërisë (44) dhe të Serbisë (30).

Nga 893 vendimet që janë marrë për kërkesat e azilit gjatë shtatë muajve, rreth 10% ose 86 raste  mund të mbeten në Luksemburg.