Shqipëri: Bashkitë, me zyra për mërgimtarët

Komisioni për Politikën e Jashtme i Kuvendit të Shqipërisë ka shqyrtuar ndryshimet në projektligjin për vetëqeverisjen vendore të propozuara nga Ministria e Shtetit për  Diasporën.

Ndryshimi në këtë projektligj vjen si rezultat i kërkesave për implementimin e dispozitave kushtetuese për mbrojtjen e të drejtave të shqiptarëve që jetojnë jashtë kufijve, qasjen drejt një ndërgjegjeje evropiane në drejtim të afirmimit të padiskutueshëm të rëndësisë që ka diaspora në ndërtimin e urave lidhëse me vendin e origjinës, si edhe ndërgjegjësimin për influencën pozitive që ka diaspora në zhvillimin ekonomik, politik e kulturor të vendit të origjinës, përcjell albinfo.ch.

Ministri i Shtetit për Diasporën, Pandeli Majko, prezantoi në Komisionin për Politikën e Jashtme ndryshimet në ligjin për vetëqeverisjen vendore. Hartimi i këtij projektligji është një hap i rëndësishëm në procesin e implementimit të reformës ligjore dhe institucionale për ndërtimin e marrëdhënieve të natyrshme të atdheut me shtetasit e vet, nëpërmjet dhënies së shërbimeve për Diasporën dhe migracionin.

“Procesi i krijimit të infrastrukturës vendore për realizimin e përgjegjësive konkrete dhe përcaktimin e strukturave shtetërore përgjegjëse për marrëdhëniet me Diasporën, është instrumenti kyç në realizimin e angazhimit politik për të mbështetur e përkrahur komunitetin shqiptar jashtë vendit”, tha ministri në fjalën e tij.