Ronaldo paguan 18.8 milionë euro për evazion fiskal

Ylli i futbollit, Cristiano Ronaldo, ka arritur një marrëveshje me një gjykatë në Madrid lidhur me akuzat për evazion fiskal, duke pranuar gjobën prej 18.8 milionë eurosh. Marrëveshja, e miratuar paraprakisht, përfshinte një dënim me burg prej 23 muajsh. Por në Spanjë, të dënuarit zakonisht nuk futen në burg me dënim nën dy vjet. Vepra jo e dhunshme e Ronaldos do të thotë se ai nuk ka gjasa të futet në burg. 

Ronaldo mbërriti në gjykatë mëngjesin e së martës në Madrid, ku pati një prani të madhe të mediave. Paraqitja e tij në gjykatë zgjati vetëm disa minuta, pasi Ronaldo pranoi marrëveshjen e ofruar nga prokurorët.

Gjyqtari refuzoi kërkesën e lojtarit për të marrë pjesë në seancë me video LIVE ose për të hyrë në ndërtesë me makinë për të shmangur mediat. Ronaldo u paraqit në gjykatë i shoqëruar nga e dashura e tij Georgina Rodriguez, përcjell albinfo.ch

Fituesi 5 herë i Topit të Artë u akuza për shmangien e pagimit të taksave në Spanjë midis 2010 dhe 2014, kur ai luante për Real Madridin dhe u zhvendos për të jetuar në kryeqytetin spanjoll. Forbes e ka renditur futbollistin si i treti më i pasur në botë, me fitime prej 95 milionë euro në vit.