Opozita në Maqedoni kundërshton ligjin për gjuhët

Opozita në Maqedoni thotë se shpallja e Ligjit për Gjuhët është vepër penale.

Shpallja e Ligjit për Gjuhët në Gazetën zyrtare në Maqedoni ka bërë që të reagojë partia opozitare VMRO-DPMNE-ja, përcjell albinfo.ch. “Paralajmërojmë drejtorin e Gazetës Zyrtare, Martin Kostovski, se shpallja e Ligjit për gjuhët në Gazetën Zyrtare është vepër penale për të cilën shkohet në burg dhe të cilën e bart drejtori i Gazetës Zyrtare dhe të gjithë të involvuarit e tjerë”, thuhet në reagimin e kësaj partie.

Zyrtarë të partisë së Gruevskit theksojnë se LSDM-ja “edhe një herë ka shkelur rendin kushtetues në Republikën e Maqedonisë”. Ligji për gjuhët u miratua më 11 janar të vitit të kaluar në situatë të tensionuar mes deputetëve. Edhe pas miratimit edhe në lexim të dytë, ky ligj nuk u nënshkrua nga presidenti maqedonas George Ivanov, por pas miratimit në lexim të tretë, nënshkrimi i tij nuk ishte i nevojshëm.

Ndërkaq, të hënën, kryeparlamentari i Maqedonisë, Talat Xhaferi, nënshkroi këtë ligj, duke thënë se është fitore për të gjithë.