Grabitjet me maska nuk ndalen, kësaj radhe në Podujevë

Foto ilustrim

Një person nga Podujeva ka raportuar se në lokalin e tij i janë vjedhur 1000 euro.

“Ankuesi mashkull K-Shqiptar ka raportuar se për deri sa ishte në lokalin e tij duke punuar tre të dyshuar të maskuar dhe nën kërcënimin e armëve të zjarri kanë grabitur rreth 1000 euro para të gatshme”, thuhet në raportin 24 orësh të policisë, përcjell albinfo.ch.

Tutje, policia thotë rasti është duke u hetuar nga njësitet relevante.

Ky është vetëm rasti i fundit i grabitjeve me armë në Kosovë, derisa para vitit të ri, kishte vdekur në detyrë polici Izet Demaj. Rasti ndodhi në Istog, kur grabitësi e ka qëlluar për vdekje, derisa më pas edhe policia e kishte mbytur grabitësin.

Grabitje me armë kanë ndodhur edhe në Prishtinë dhe qytetet tjera, derisa qytetarët janë të alarmuar nga kjo dukuri, që është shpeshtuar së fundi.