Investimi zviceran bën katër fshatra me ujë të pijes

Ambasadorja Marty tha se Zvicra ka investuar në 73 fshatra të Kosovës duke rregulluar sistemin e ujit të pijshëm, ndërsa premtoi ndihmë të vazhdueshme edhe në fshatrat tjera

Qeveria e Zvicrës ka vazhduar aktivitetin e saj humanitar në rajonin e Gjilanit, duke u bërë kështu, promotori kryesor i investimeve në ujësjellës. Me ndihmën helvetike, të enjten zyrtarisht u bën me ujë të prijës katër fshatra që shtrihen rrëzë maleve të Karadakut.

Mbi 1000 familje të fshatrave Zhegër, Nasalë, Lladovë dhe Budrigë e Ulët, u bën me ujë të pijes, nga një investim i përbashkët i Qeverisë së Zvicrës, Qeverisë së Kosovës dhe Komunës së Gjilanit.

Vlera e projektit arrin në mbi 400 mijë euro, ndërsa shumica ishte ndihë nga Zvicra.

Në ceremoninë e inaugurimit që u mbajt në Zhegër, ishte i pranishëm edhe kryetari i Gjilanit, Qemajl Mustafa, ambasadorja e Zvicrës në Prishtinë, Christina Marty dhe Ramadan Asllani nga Ministria e Zhvillimit Ekonomik.

Mustafa tha se projekti ka vlerë të madhe sepse është investim i përbashkët i Komunës së Gjilanit, Qeverisë së Zvicrës dhe zyrës së kryeministrit.

“Qeveria e Zvicrës është e pranishme që nga pas lufta në Gjilan dhe ka ndihmuar e kontribuar shumë në infrastrukturën e ujësjellësit në tërë qytetin e Gjilanit”, tha prefekti Mustafa, citon rajonipress. Gjilani me fshatrat e saj, sipas tij, tashmë ka një shtrirje prej 90 për qind të rrjetit të ujit.

Mustafa u ka premtuar zhegranëve se ata shpejt do të mund të bëhen komunë, nëse me këtë çështje merret seriozisht Qeveria dhe nëse ka një studim të thuktë. “Zhegra tani me këto investime realisht është shndërruar në një qytezë e pse jo të mos bëhet edhe komunë, por paraprakisht duhet të ketë një analizë të mirë ekonomike”, tha ai.

Kurse ambasadorja e Zvicrës, Christina Marty u shpreh krenare që shteti i saj ka pasur mundësi të marrë pjesë në këtë investim, i cili e ndihmon jetën e banorëve të këtyre fshatrave.

Marty tha se Zvicra ka investuar në 73 fshatra të Kosovës ku ka rregulluar sistemin e ujit të pijshëm dhe do të vazhdojmë sërish ta përkrahim këtë sektor.

Edhe Ramadan Asllani zëvendësministër i Zhvillimit Ekonomik tha se Qeveria e Kosovës po përkrah dhe participon në projektet e dobishme e të cilat e ndryshojnë jetën e qytetarëve tanë.