Qelia shumë e vogël, i burgosuri kërkon dëmshpërblim

Avokatja kërkon në emrin e të burgosurit, dëmshpërblim prej 17.000 frangash; nga 100 franga për çdo ditë të vuajtjes së dënimit

Një kërkese të një personi që po vuan dënimin në burgun Champ-Dollon të Gjenevës i është bërë jehonë e madhe në mediet zvicerane. I burgosuri ka paditur burgun për hapësirën shumë të vogël që i është lënë në dispozicion dhe për këtë ka kërkuar dëmshpërblim.  

Avokatja e të burgosurit ka lexuar regulloret ku shkruan se hapësira minimale e lejuar për një të burgosur është 4 metra katrorë. Ndërsa ajo ka gjetur se klienti i saj jeton në një qeli që mezi ka 3.84 metra katrorë, shkruan gazeta „Le Temps“ e të mërkurës. Për këtë arsye, avokatja kërkon në emrin e të burgosurit që është dënuar për vjedhje, një dëmshpërblim prej 17.000 frangash. Kjo shumë ka dalë pasi që ajo ka llogaritur nga 100 franga për çdo ditë që klienti i saj ka kaluar në burg.

Avokatja nuk ka pasur sukses të bindte autoritetet që ta lironin të burgosurin. Në kërkesën e saj ajo i ishte referuar trajtimit jo dinjitoz që ai kishte në atë burg. E njëjta avokate ka kërkuar po ashtu edhe lirimin e një të burgosur tjetër në Champ-Dollon, i cili detyrohet të flejë në dysheme.