Kush janë të ftuarit nga Gjykata Speciale

Gjykata Speciale ka ftuar për intervistim edhe ish-ushtarin e UÇK-së nga Zona Operative e Pashtrikut, Safet Syla.

Ai ka shprehur gatishmërinë për bashkëpunim me Specialen, por jo edhe Remzi Shala, ish komandant i UÇK-së në Zonën e Pashtrikut, i njohur me pseudonimin “Molla e Kuqe”.

Ai ka thënë se nuk do të përgjigjet po do të refuzojë pasiqë nuk e  njeh Gjykatën Speciale, përcjell albinfo.ch.

Deri tash ftesa nga Gjykata Speciale kanë pranuar edhe ish-komandantët e tjerë Rrustem Mustafa (Zona Operative e Llapit), Sokol Dobruna (Gjykata ushtarake e UÇK-së), Sami Lushtaku (Zona Operative e Drenicës) e Nazif Mehmeti (një nga komandantët në Zonën Operative të Llapit), shkruajnë mediat kosovare.

Ndërsa kryeministri i Kosovës, Ramush Haradinaj deklaroi se Qeveria do t’i qëndrojë afër luftëtarëve të lirisë dhe në çdo kohë do t’ju ofrojë ndihmën e nevojshme për mbrojtje juridike.

“Lufta jonë çlirimtare ishte e drejtë dhe e shenjtë dhe kjo është dëshmuar tashmë. Nga ne, janë kërkuar gjithnjë e më shumë sakrifica e përballje me drejtësinë, ndonëse ne ishim viktima të agresionit. Përgjigjja e qytetarëve të Kosovës dhe ish pjesëtarëve të UÇK-së, filtrave të drejtësisë ndërkombëtare ka qenë e menjëhershme dhe pa hezitim”, ka thënë ai.