Ukraina shpall 30 ditë gjendje të jashtëzakonshme

EPA/STEPAN FRANKO

Organizata për Siguri dhe Bashkëpunim në Evropë kërkoi nga Rusia dhe Ukraina që të përmbahen nga provokimet dhe të zgjidhin kontestet në mënyrë paqësore. 

OSBE, me mision vëzhgues në Ukrainë, u bëri thirrje palëve të përmbahen nga dhuna. 

Tensionet janë shtuar mes Ukrainës e Rusisë, kur kjo e fundit ndaloi tri anije ukrainase nën arsyetimin se shkelën territorin e saj, ndërkaq Parlamenti ukrainas miratoi gjendjen e jashtëzakonshme të luftës që do të vlejë në vend për një muaj. 

Autoritetet tani mund t’i kufizojnë tubimet publike dhe t’i sistemojnë mediat. Përplasja detare e së dielës ndodhi jashtë brigjeve të Krimesë – gadishull i Ukrainës i aneksuar nga Rusia në vitin 2014. 

Anijet e rojës bregdetare ruse hapën zjarr përpara se forcat e saj speciale t’i sulmonin anijet e Ukrainës. Disa ukrainas madje janë plagosur.