Konjufca: Mërgimtarët, kundër kanalit për diasporën

Komisioni për Punë të Jashtme, Diasporë dhe Investime Strategjike ka diskutuar për Ligjin për diasporën, i propozuar nga ministri Gashi.

Deputeti i VV-së, Glauk Konjufca, ka thënë se në bisedim me njerëzit nga diaspora shumica prej tyre janë shprehur kundër një kanali të pavarur për diasporën.

“Sipas tyre, një televizion i ri për diasporën i shkëput ata nga atdheu, sepse ata kanë nevojë të dinë dhe të mësojnë për Kosovën dhe historinë e saj. Janë të rëndësishme bisedimet me ta, sepse ne nuk i dimë nevojat reale të tyre”, tha ai.

Komisioni kishte thirrur për raportim për këtë mbledhje ministrin e Punëve të Jashtme, Behgjet Pacolli, për të diskutuar lidhur me lobimet që po bëhen para anëtarësimit të Kosovës në Interpol, por ai nuk ka shkuar.

Kryetarja e komisionit, Vjosa Osmani, ka thënë se komisioni po insiston vazhdimisht për raportim të ministrit të Jashtëm, mirëpo edhe përkundër insistimit ky i fundit nuk ka ardhur në raportim.

“Ne po insistojmë që ta kemi ministrin e Punëve të Jashtme në komision, sidomos tash kur Serbia është angazhuar për tërheqje të njohjeve të Kosovës. Tash pak ditë para se të votohet në Interpol na ka dërguar një e-mail, ku thotë se cilat janë rekomandimet tuaja, tash është vonë për shkak se deri tash është dashur të jetë kryer lobimi dhe nuk ka më kohë”, ka thënë ajo.