Blatter shkon në Serbi për të ndërmjetësuar për Kosovën

Malaj: "Blatter më tha se menjëherë pas këtij vikendi do të shikojë mundësinë të shkojë në Serbi, ku planifikon të takohet edhe me presidentin e atjeshëm, Tomislav Nikoliq”

Presidenti i FIFA-s, Sepp Blatter ka njoftuar sot ambasadorin e Republikës së Kosovës në Zvicër, Naim Malaj për rrjedhat e mbledhjes dyditore të komitetit ekzekutiv të FIFA-s të mbajtur në Cyrih.

Siç bën të ditur Malaj për albinfo.ch, Blatter e ka marrë atë personalisht në telefon për t`ia sqaruar qëndrimin më të ri të rrugës së zgjidhjes që do ta marrë çështja e lojërave miqësore të kombëtares së Kosovës.

“Rasti i Kosovës, respektivisht letra e kryeministrit kosovar ka qenë në rend dite të mbledhjes së Komitetit Ekzekutiv. Ka hasur simpati por edhe në kundërshtime. Këto të fundit sidomos nga “Grupi i Platinit”, gjegjësisht disa vendeve evropiane që përfaqësojnë UEFA-n në komitetin e FIFA-s”, transmeton Malaj fjalët e njeriut të parë të Organizatës Botërore të Futbollit.

Ndërsa më e rëndësishmja që ka dalë nga kjo bisedë, siç thotë Malaj, ka qenë qëndrimi i Blatter-it për të shkuar në Serbi, ku do të përpiqet të ndërmjetësojë me strukturat e atjeshme politike dhe ato të futbollit një zgjidhje të pranueshme për të dyja palët.

“Blatter më tha se menjëherë pas ndeshjeve të këtij vikendi do të shikojë mundësinë për të shkuar në Serbi, ku planifikon, veç tjerash, të takohet edhe me presidentin e atjeshëm, Tomislav Nikoliq”. Ai është optimist se çështja do të marrë një zgjidhje pozitive. “Besoj se do ta heqim këtë padrejtësi”, ka thënë Blatter,siç njofton Malaj.  

Këtë optimizëm Blatter e mbështet edhe në zhvillimet e fundit, sipas tij pozitive, politike në raportin Kosovë-Serbi në Bruksel.

Malaj me këtë rast vë theksin edhe në aftësitë negociuese të shefit të FIFA-s. Ai e vlerëson nismën e Blatter-it si edhe një hap drejt ndërkombëtarizimit të futbollit kosovare.

Siç është njoftuar opinioni tashmë, të enjten, presidenti i FIFA-s ka kumtuar se komiteti ekzekutiv e ka ngarkuar atë që të ndërmjetësojë në mes të Serbisë dhe Kosovës lidhur me çështjen kontestuese të pjesëmarrjes së kombëtares kosovare në ndeshjet miqësore ndërkombëtare.

Me vendimin e FIFA-s, Kosova duhet që për të luajtur në ndeshjet e përmendura të marrë lejen e Serbisë. Ky vendim me gjithë përpjekjen e Blatter-it nuk ka mundur të anulohet, por ngarkimi i këtij të fundit për të ndërmjetësuar, konsiderohet si një rrugë drejt zgjidhjes se kompromisit.