Specialistët e huaj fitojnë më së shumti në Zvicër

Paga mesatare vjetore është thënë të jetë 202,865 dollarë

Në renditjen e klasifikuar nga ekspertët e huaj, që me një term tjetër quhen “expat”, në mesin e vendeve më të mira të synuara, Zvicra renditet në vendin e 8-të. Në veçanti është vlerësuar cilësia e jetës në Zvicër për nga siguria, transporti dhe kujdesi mjekësor, por pa lënë anash pagat.

Paga mesatare vjetore është thënë të jetë 202,865 dollarë, përcjell albinfo.ch.

Krahasuar me të ardhurat në vendet e tyre, të ardhurit në Zvicër mund të përmirësojnë të ardhurat e tyre me një mesatare prej 61.000 dollarësh, sipas studimit të publikuar të enjten. E dyta sipas radhës së pagave është SHBA-ja (paga mesatare 185,119 dollarë), pasuar nga vendet aziatike, si Hong-Kongu, Kinë dhe Singapori (rreth 162,000 – 179,000 dollarë).

Në arsyet e një lëvizjeje të mundshme në Zvicër, motivimi monetar nuk luan një rol të madh, siç shkruan HSBC. Tridhjetë e pesë për qind e të anketuarve i quajtën vendimet e karrierës si vendimtare dhe 32 për qind vlerësuan një cilësi më të mirë të jetës. Paga, megjithatë, u përmend vetëm për 24 për qind si arsye kryesore.

Sipas mendimit të të huajve që jetojnë këtu, 62 për qind thonë se Zvicra është një vend i mirë për të vazhduar karrierën e tyre dhe 73 për qind e vlerësojnë cilësinë e jetës më të mirë se në vendin e tyre.

Nga ana tjetër, zviceranët, të cilët shkojnë jashtë vendit si të huaj, mesatarisht duhet të pranojnë ulje të pagave prej rreth 6 për qind. Për më tepër, përqindja e sipërmarrësve është rreth dy herë më e lartë se në mesataren e përgjithshme.

Renditja e përgjithshme e studimit HSBC udhëhiqet nga Singapori, me Zelandën e Re dhe Gjermaninë, respektivisht në vendin e dytë dhe të tretë. Kanadaja, Bahrejni, Australia dhe Suedia janë gjithashtu përpara Zvicrës.

Anketa u krye në mes të prillit dhe majit, me 22,318 njerëz nga 163 vende pjesëmarrëse. Për t’u kualifikuar për listën, u kërkuan përgjigje nga 100 të jashtëm dhe 30 prindër nga vendi. Si rezultat, lista është kufizuar në 31 vende.

Termi “expat” zakonisht u referohet profesionistëve të kualifikuar të niveleve më të larta të të ardhurave, të punësuar nga kompanitë ndërkombëtare, të cilët shpesh janë të punësuar për periudha të caktuara jashtë vendit të tyre.

---