Viktor B. kishte pasur probleme me ligjin

Prokuroria e Lucernit thotë se më 13 mars të vitit 1998, tashmë i ndjeri, ishte dënuar me 12 muaj burg me kusht për pjesëmarrje në një grabitje

Prokuroria e përgjithshme e Lucernit vetëm sot pasdite ka dhënë detajet e para në lidhje me Viktor B., shkaktar i vdekjes së katër personave, përfshirë edhe veten, në tragjedinë e ndodhur të mërkurën në Menznau të Lucernit. Viktor B. është i lindur në Kosovë, në vitin 1971 ndërsa në Zvicër ka ardhur si azilkërkues në vitin 1991. Vite më vonë ai ka marrë shtetësinë e Zvicrës. Ai ka qenë i martuar dhe ka pasur tre fëmijë.

Një detaj i rëndësishëm që ka dhënë prokuroria ka të bëjë me recidivizmin e Viktorit. Ai ka qenë i dënuar njëherë, por me kusht. Kjo ka ndodhur më 13 mars të vitit 1998, kur tashmë i ndjeri, ishte dënuar me 12 muaj burg me kusht për pjesëmarrje në një grabitje.

Ndërsa duke bërë fjalë për krimin e pardjeshëm, prokuroria thotë se “obduksioni i kufomës ka treguar se Viktor B., ka vdekur në vendin e ngjarjes, i qëlluar me armë”. Ai kishte qenë i vdekur në momentin kur policia ka arritur në vendin e ngjarjes. Por, se në ç`mënyrë i janë shkaktuar atij plagët vdekjeprurëse, mbetet objekt i hetimeve të mëtejme. Të plagosurit, për shkak të gjendjes së rëndë të tyre nuk kanë mundur të merren në pyetje, gjë që do të mund të sillte më shumë dritë në ngjarjen tragjike.

Ndërkohë është arrestuar edhe personi i cili ka pasur në dorë armën vdekjeprurëse para se ta merrte atë Viktor B. ai është një 43 vjeçar nga kantoni Obwalden.

Sipas prokurorisë, pesë të plagosur ndodhen ende në spital, prej tyre dy veta janë në rrezik jete.