Hoxha thotë se po ecën mirë procesi i integrimit

“Kosova, përveç se është duke përmbushur kriteret për anëtarësim në BE, edhe po e përshpejton këtë proces”, është thënë në takimin e Komitetit të Stabilizim Asociimit ndërmjet Bashkimit Evropian dhe Kosovës.

Ministrja e Integrimit Evropian, Dhurata Hoxha, është e bindur se deri në fund të vitit Qeveria do të arrijë të përmbyllë planin e veprimit, përcjell albinfo.ch.

Shefi i Njësisë për Kosovë dhe Maqedoni i Komisionit Evropian, David Cullen, tha se progresi i Kosovës do të matet nëpërmjet zbatimit të dokumenteve ligjore.

“Në rajon ka pasur zhvillime të mira. Dialogu Kosovë -Serbi duhet të shfrytëzohet nga autoritetet kosovare, në mënyrë që të përdoret ky moment. Në takimin e Këshillit të Stabilizim-Asociimit që do të mbahet vitin e ardhshëm, duhet të shohim përkushtimin e të gjitha autoriteteve në Kosovë që të ofrojnë çështjet më të rëndësishme, si reformat, luftën kundër korrupsionit dhe krimit të organizuar që duhet t’i jepet prioritet absolut”, tha ai.