I burgosuri shqiptar në Gjermani, bashkautor i librit të kuzhinës shqiptare

Me ndihmën e menaxherit të zonës së shërbimit Albert Murrweiss, dy të burgosur në burgun Heilbronn kanë përpiluar një libër kuzhine "Bad Boys" me ushqimet nga atdheu i tyre

Që nga botimi i parë, libri është shitur menjëherë, ndërsa të ardhurat shkojnë për një projekt të fëmijëve, shkruan “Stimme”, përcjell Albinfo.ch.

“Nuk e kam pritur një sukses kaq të madh”, pohon Murrweiss. Ishte një ndjenjë e veçantë për të burgosurit, “për të bërë tituj pozitivë”. Të ardhurat nga projekti – 2.417,10 euro kernare, shkojnë për projektin e fëmijëve “Ndihmë e madhe për heronjtë e vegjël” të klinikave SLK në Heilbronn.

Një libër kuzhine nga të burgosurit? Kjo nuk ka ndodhur kurrë në Heilbronn. Ideja e shkruarjes së tij rrodhi nga një kuzhinë e përbashkët e burgut, kur Murrweissi ndjeu një aromë të pazakonshme ekzotike të ushqimit të përgatitur. Aty, sidomos iraniani Mehdi Aeineh Kar (36) dhe kosovari Ekrem Avdyli (45) diskutonin në mënyrë euforike për përgatitjen e ushqimit, transmeton Albinfo.ch. Aromat nga Orienti dhe nga Ballkani e vërshuan sallën. Dueti në fjalë përgatiti ushqim që gjithashtu ishte shumë i shijshëm edhe për syrin. “Ata kanë talent dhe kanë bërë një përpjekje të vërtetë”, thotë menaxheri.

Ai ua sugjeroi idenë me librin e kuzhinës dhe pas disa bisedave me të burgosurit që për delikte të ndryshme gjenden prapa grilave, projekti mori rrugën e mbarë.

Jo vetëm në shitoren në afërsi të burgut të Heibronnit, një dyqan tjetër në burg me produkte nga punëtoritë, por edhe tregun e festave të Krishtlindjes libri i shtypur në shtypshkronjën e burgut është shitur menjëherë, shkruan më tej Albinfo.ch.

Ndërkohë, të gjitha 600 kopjet janë shitur dhe Murrweiss tani është duke shqyrtuar mundësinë e një botimi të dytë.

Në libër janë shkruar rreth 30 specialitete me përbërës dhe informata mbi gatimin e tyre. “Gomorrha karkaleca”, “Qofte Al Capone” ose “Makarona alla Knasta”, “Ruletë ruse”, “Basmehdi Curry” ose “Pjata mrekulluese Aladdin” mund të gjenden në te. Përbërës të zakonshëm janë hudhrat, domate, xhenxhefili dhe salca curry, ndërsa prodhime te veçanta janë hurmat, kokosi, mjaltë dhe produktet e çokollatës së bardhë.

“Sa për mjetet e thjeshta të kuzhinës së vogël të burgut, ajo ka shije shumë të mirë “, vlerëson Murrweiss. Për të, ushqimet kishin “cilësi të restorantit”. Njëri nga dueti i të burgosurve, gjatë këtij viti do të lirohet nga burgu. Ai është duke menduar nëse mund të punësohet në ndonjë restorant. “Për çdo rast, ai ka një referencë të mirë për aplikim”, është i sigurt Murrweiss.

Kur të gjitha librat u shitën dhe të ardhurat u fiksuan, të burgosurit ishin krenarë. Përgjigja e mirë ishte një nderim i madh për të, informon më tej Albinfo.ch.

“Të jesh në gjendje të përjetosh krijimtarinë në një mjedis shumë të rregulluar ashpër, ka qenë një përvojë e madhe për ne”, pohon autori i librit Mehdi. Për shokun e tij të gatimit Ekremin, projekti tregon se çfarë është e mundur me iniciativën dhe mbështetjen e të tjerëve “pa marrë parasysh se çfarë historie qëndron pas tij”.

---