Ambasadori zviceran: Kosova nuk ka bërë shumë në luftën kundër korrupsionit

Ambasadori i Zvicrës në Kosovë, Jean Hubert Lebet, ka marrë pjesë  në hapjen e punimeve të konferencës rajonale kundër korrupsionit.

Ai ka thënë se janë dy arsye pse Kosova nuk ka bërë shumë në luftën kundër korrupsionit.

Lebet ka thënë se arsye e parë është mjedisi që përfshin edhe legjislacionin joadekuat dhe kualifikim jo i mirë i nëpunësve civilë, si dhe rrogat e vogla në sistemin publik, përcjell albinfo.ch.

Ndërsa arsyeja e dytë, sipas ambasadorit zviceran, ka të bëjë me mungesën e përkrahjes për policinë dhe gjyqtarët për t’u siguruar atyre pavarësi në punën e tyre.

“Qytetarët e dënojnë korrupsionin, por nuk ka ndonjë dëshmi të fuqishme për luftën kundër korrupsionit. Do të nevojitet kohë, por ka përparime spektakulare në rajon, që ka filluar në Rumani. S’po them që gjithë zyrtarët e lartë janë të korruptuar. Është me rëndësi të mbrohet reputacioni i zyrtarëve të ndershëm, duke mënjanuar mollët e kalbura. Jam duke përcjellë procesin e vetingut dhe pres përparim në luftën kundër korrupsionit”, ka thënë ai.

Ai ka vlerësuar se nuk janë të korruptuar të gjithë zyrtarët publikë, derisa ka kërkuar që të mbrohet reputacioni i zyrtarëve të ndershëm, duke i larguar të korruptuarit.