Toka shpëtoi nga asteroidi

NASA: Në orën 20 e 25 minuta sipas kohës sonë, asteroidi 2012 DA14 kaloi pranë Tokës

Mediat botërore i kanë kushtuar vëmendje të veçantë një asteroidi me diametër 45 metra, apo e thënë ndryshe, me përmasat e një pishine olimpike, i cili ka  kaluar shumë afër Tokës në një distancë rekorde prej vetëm 27.700 km.

Asteroidi dukej si një vijëz e ndritshme në qiellin e errët dhe ka kaluar mbi Oqeanin Indian, në afërsi të ishullit Sumatra.

Shkencëtarët e NASA-s thonë se gravitacioni i Tokës e ka devijuar rrugën e asteroidit, kështu që pas 30 vjetësh ai do të kalojë më afër Tokës, por edhe atëherë nuk do të ketë rrezik për planetin tonë. 

Sido që të jetë, shumë asteroide po vëzhgohen nga NASA. Shkencëtarët kanë përjashtuar mundësinë e një impakti me Tokën.

Kështu thotë njëri prej drejtuesve të NASA-s, Don Yeomans, transmeton CNN.

Megjithatë, një mundësi e tillë është tmerrësisht e vogël.

Trupa qiellorë me përmasat e asteroidit të quajtur 2012 DA 14 mendohet se e godasin Tokën një herë në 1,200 vjet.

Gjatë afrimit, shpejtësia e asteroidit llogaritet të ketë qenë 7,8 kilometra në sekondë, që do të thotë 8 herë më e madhe se ajo e plumbit të një arme të fuqishme.

Mbërritja e tij u parapri nga rënia e një meteori në Rusi, që shkaktoi dëme e të plagosur, por nisur nga trajektorja e lëvizjes së këtij të fundit, ekspertët kanë dalë në përfundimin se të dy këto ngjarje nuk kanë lidhje me njëra-tjetrën dhe se thjesht bëhet fjalë për një koincidencë kozmike, siç preferuan ta quajnë ata.

Nëse do të ishte rrëzuar, asteroidi që është thuajse sa gjysma e një fushe futbolli mund ta kishte fshirë Washington-in nga harta.

Sipas NASA-s, rreth 9.700 trupa qiellorë janë klasifikuar si objekte afër Tokës, që janë kometa apo asteroidë në orbita, të cilave iu mundësohet afrimi me planetin tonë.