Ilaçet në Zvicër shumë më shtrenjtë se në vendet fqinje

“Në Zvicër janë 140 mijë njerëz që marrin të ardhurat e tyre nga industria farmaceutike dhe këta njerëz paguhen me franga”

Federata e arkave të shëndetësisë Santesuisse dhe asaj të farmaceutikës interpharma kanë prezantuar të martën një studim sipas të cilit barërat generika (surrogate, jo origjinale) në Zvicër janë shumë më shtrenjtë se sa jashtë vendit. Generika-t llogariten si alternativë më e lirë për nga çmimi të barnave.

Por në Zvicër edhe ato janë pothuaj dyfish më shtrenjtë se në shtetet që e rrethojnë Zvicrën. Ndërsa medikamentet të cilat vazhdojnë ta kenë mbrojtjen e patentës, në Zvicër janë vetëm 12 për qind më shtrenjtë.

Studimi i përmendur më lartë ka marrë për bazë 200 medikamentet origjinale më të shitura dhe 200 barëra alternative (generika). Janë krahasuar çmimet në vendet si Gjermani, Danimarkë, Holandë, Britani e Madhe, Francë dhe Austri.

Interpharma i konsideron të arsyeshme çmimet e larta që mbretërojnë në Zvicër. Argumenti i saj është se frangu vazhdon të jetë i forte në krahasim me euron dhe se sistemi shëndetësor i Zvicrës është më i mirë se ai i vendeve të krahasuara si dhe kostoja e jetës në Zvicër është më e lartë se në vendet e përmendura.

“Në Zvicër janë 140 mijë njerëz që drejtpërdrejt ose indirekt marrin të ardhurat e tyre nga industria farmaceutike”, ka thënë sekretari i Interpharma Thomas Cueni, “dhe këta njerëz paguhen me franga”. Kjo pra kushton dhe për këtë arsye është gabim të shikohen vetëm çmimet më të lira të barërave jashtë vendit. Ai ka thënë se bazuar në fuqinë blerëse, çmimet e barërave në Zvicër dhe në Francë janë më të ulëtat