Kantoni i Bernës, rreth 400 milion deficit

Pritet që debati për kursime të reja do të jetë shumë më i ashpër se sa debati i fundit për pakon e kursimeve prej 100 milionë frangash

Kantoni i Bernës ka mbyllur vitin 2012 me një deficit shumë të madh. Siç ka bërë të ditur drejtorja e financave e këtij kantoni Beatrice Simon për gazetën “Bund”, shifrat e sakta do të publikohen pas një muaji. Mirëpo bazuar në trendin e shënuar në tetor të vitit të kaluar, bëhet fjalë për një deficit dhe futje në borxh prej rreth 375 milionë franga.

Mirëpo, Simon ka theksuar se Kantoni i Bernës nuk i ka lejuar vetes ndonjë luks. Këtë e tregon edhe kontrollimi i rrjedhave financiare i bërë nga ekspertë të jashtëm. “Ne mund të kursejmë vetëm nëse detyrat që kemi do t`i lëmë përgjysmë ose modifikojmë”, ka thënë ajo.

Aktualisht drejtoria e saj është duke bërë krahasimet me kantonet tjera, për të pasur të dhëna të reja. Ajo që pritet është se debati për kursime të reja do të jetë shumë më i ashpër se sa debati i fundit për pakon e kursimeve prej 100 milionë frangash, që parlamenti i kantonit e ka miratuar.

Kantoni i Bernës duhet të heq qafe një deficit strukturor prej rreth 400 milionë frangash.