Pas 50 vitesh e gjen vajzën e grabitur

Kur e kishte lindur vajzën, i ishte thënë se e porsalindura kishte vdekur. Për këtë arsye ajo deri pak ditë më parë nuk kishte pasur idenë për ekzistencën e të bijës

Një nënë në provincën Valencia të Spanjës është takuar me të bijën për të cilën kishte menduar se ishte e vdekur. Autoritetet kishin nisur hetimet e tyre në tetor të vitit 2011, pasi që bija e grabitur si foshnjë kishte nisur, për arsye të panjohura, të dyshonte se ajo ishte e grabitur.

Pas një hulumtimi të bërë në arkivat e vjetra, u përpilua një listë me rreth 200 gra, njëra prej të cilave mund të ishte nëna. Pasi që janë gjetur këto gra, ato janë marrë në pyetje në hollësi, dhe nga seleksionimi i kujdesshëm, prej tyre ka mbetur gruaja e moshuar nga Valencia, të cilës i është bërë analiza ADN.

Nga kjo është konstatuar padyshim se pikërisht ajo është nëna biologjike. Ajo është shprehur shumë e befasuar kur ka kuptuar të vërtetën. Në vitin 1964, kur ajo kishte lindur vajzën e saj, i ishte thënë se e porsalindura kishte vdekur. Për këtë arsye nëna në fjalë deri pak ditë më parë nuk kishte pasur idenë për ekzistencën e të bijës. Siç ka njoftuar policia, hetimet në vazhdim do të vazhdojnë për të gjetur përgjegjësit për grabitjen e foshnjës të bërë para afër 50 vitesh.