Reshjet e borës mbyllin Aeroportin e Bazelit

Edhe në Aeroportin e Cyrihut janë anuluar 15 fluturime dhe 18 aterrime, për shkak të borës dhe motit të ligë

Bora që ka rënë ditën dhe mbrëmjen e të enjtes është bërë shkak për anulimin e të gjitha fluturimeve në Aeroportin EuroAirport Basel-Mulhouse-Freiburg. Me rastin e anulimit, është njoftuar se fluturime dhe aterrime nga ky aeroport nuk do të ketë së paku deri në orën 5 të mëngjesit të të premtes.

Pasagjerët që kanë pësuar nga këto anulime janë lutur që për informata më të hollësishme tu drejtohen kompanive të tyre ajrore ku kanë marrë biletat.

Ndryshe nga Bazeli, Aeroporti i Cyrihut, më i madhi në vend, nuk e ka ndërprerë krejtësisht punën. Por edhe në Cyrih janë anuluar 15 fluturime dhe 18 aterrime, për shkak të borës dhe motit të ligë. Po për këtë shkak, shumica e fluturimeve janë bërë me vonesë prej 20 deri 90 minutash.

Reshjet e mëdha të borës kanë çrregulluar edhe komunikacionin hekurudhor dhe atë automobilistik në Zvicrën gjermane. Janë shënuar një numër i madh aksidentesh por, për fat, pa pasoja të mëdha.