Kosova

Lirohet nga detyra ministri i Tregtisë dhe Industrisë

E mërkurë, 5 Shtator 2018 - 23:00 albinfo.ch

Qeveria e Kosovës, me kërkesë të Nismës Socialdemokrate, ka marrë vendim për ta liruar nga detyra ministrin e Tregtisë dhe Industrisë, Bajram Hasani.

Lajmin për KTV-në e ka konfirmuar zëdhënësja e Qeverisë së Kosovës, Donjeta Gashi, e cila ka thënë se ministri u lirua nga detyra me kërkesë të partisë së tij, Nisma Socialdemokrate.

Tani, jozyrtarisht është raportuar se në krye të MTI-së do të jetë zëvendësministrja aktuale nga Nisma, Arbëresha Krasniqi.

Nisma udhëheq me tri ministri në Qeverinë e Kosovës. Kryetari i këtij subjekti, Fatmir Limaj, mban postin e zëvendëskryeministrit në Qeverinë e Kosovës.