Vatikan: Paguhet vetëm kesh

Vatikani nuk ka plotësuar të gjitha masat e sigurisë të përcaktuara nga Bashkimi Evropian për të parandaluar pastrimin e parave

Turistët në Vatikan tash e tutje për të vizituar muzetë apo për të blerë suvenire apo ndonjë gjë tjetër duhet të paguajnë vetëm me para të gatshme, pasi Banka Qendrore e Italisë ka vendosur për të bllokuar pagesat elektronike.

Gazeta italiane “Corriere della Sera” shkruan se bllokada e imponuar për Selinë e Shenjtë vjen ngase Vatikani nuk ka plotësuar të gjitha masat e sigurisë të përcaktuara nga Bashkimi Evropian për të parandaluar pastrimin e parave.

Kjo do të thotë se bankat italiane nuk lejohen të punojnë në territorin e Vatikanit dhe “Deutsche Bank Italia”, e cila për 15 vjet i ka ofruar Vatikanit shërbime të pagesave elektronike, njoftoi se Banka e Italisë ka tërhequr autorizimin pas 31 dhjetorit 2012, njoftoi AP.

Vatikani po bën përpjekje për të zgjidhur këtë problem për mijëra turistë që vizitojnë muzetë e saj të njohur, por nuk ka komentuar dyshimet për bllokimin e pagesave elektronike.

Në mënyrë që të përmirësojnë masat për të zbuluar dhe për të parandaluar pastrimin e parave, Vatikani pak muaj më parë ka punësuar një ekspert zviceran, thotë AP. 

Muzetë, dyqanet e suvenireve dhe turnetë janë një burim i madh i të ardhurave për Vatikanin.