Katastrofat natyrore i kushtuan botës 160 miliardë

Vetëm nga stuhia Sandy, që kishte sulmuar SHBA-në gjatë tetorit janë shkaktuar dëme prej 25 miliardë dollarësh

Të gjitha dëmet e shkaktuara nga fatkeqësitë e mëdha natyrore që kanë ndodhur gjatë vitit 2012, të llogaritura së bashku, bëjnë 160 miliardë dollarë. Kështu ka konstatuar organizata për sigurimin e dëmeve “Rück” e Munihut, Gjermani, më e madhja e këtij lloji në botë.  

Sipas vlerësimit të Rück, gjatë vitit që sapo iku, më së shumti nga katastrofat natyrore është goditur SHBA.

Vetëm nga stuhia Sandy, që kishte sulmuar SHBA-në gjatë tetorit janë shkaktuar dëme prej 25 miliardë dollarësh.

Megjithatë, marrë në përgjithësi, në nivel planetar, gjatë vitit 2012 ka pasur më pak dëme nga katastrofat natyrore se sa gjatë vitit 2011.

Gjatë atij viti, vlera e dëmeve të shkaktuara nga kjo bazë në gjithë botën ka qenë 400 miliardë dollarë.

Pjesa më e madhe e këtyre dëmeve është shkaktuar nga dy tërmetet në Japoni dhe në Zelandën e Re.