Spitalet zvicerane me numra rekorde lindjesh

Inspelspital i Bernës ka bërë të ditur se në repartin e lindjeve janë realizuar 1454 lindje, që është shifra më e madhe e 32 viteve të fundit

Në Zvicër duket që viti që sapo shkoi të ketë sjellë më shumë lindje fëmijësh se vitet pararendëse. Kjo përshtypje fitohet kur të shikohen të dhënat që vijnë nga maternitetet e disa spitaleve zvicerane, që i kanë publikuar në fund të vitit 2012.

Kështu, Inspelspital i Bernës ka bërë të ditur se në repartin e lindjeve janë realizuar 1454 lindje, që është shifra më e madhe e 32 viteve të fundit. Një rekord e ka shpallur tashmë edhe Spitali Universitar i Cyrihut, gjegjësisht materniteti i tij. Me 2658  fëmijë të lindur brenda vitit ose me 22 më shumë se në vitin 2011, edhe ky spital ka shënuar një rekord të viteve të fundit.

Me 1500 lindje, Spitali Kantonal i Frauenfeldit ka shënuar një rritje krahasuar me vitin 2010 dhe 2011, por nuk bëhet fjalë për ndonjë rekord, shkruan news.search.ch

Shifra të ngjashme të lindjeve me ato të vitit pararendës janë shënuar në Spitalin  universitar të Bazelit.