Murati: Sistemi i drejtësisë në Kosovë është i kalbur

Edhe kryetari i Lëvizjes për Bashkim, Valon Murati, është përfshirë në debatin e ngritur së fundmi për listat e veteranëve. Ai ka thënë se këto lista janë manipuluar në funksion të klientelizmit partiak e klaneve kriminale.

“Se listat e veteranëve luftëtarë janë manipuluar në funksion të klientelizmit partiak e klaneve kriminale, kjo nuk do shumë fakte për ta dëshmuar. Numri i mbi 60.000 veteranëve luftëtarë e dëshmon këtë. Nuk ka variant, sado fleksibël, që mund ta çojë numrin e veteranëve luftëtarë në më shumë se 25.000 vetë. Me këtë akt po shtrembërohet e vërteta mbi luftën çlirimtare”, ka thënë në reagimin e tij Murati, përcjell albinfo.ch.

Ai ka thënë se akuzat e ish-prokurorit Elez Blakaj kundër kryeprokurorit Lumezi e të kryeministrit Haradinaj e vërtetojnë kalbjen e sistemit të drejtësisë në Kosovë.

Murati ka shtuar se pa vendosjen e sundimit të ligjit, nuk mund të ketë ekonomi, arsim e shëndetësi të mirë, përcjell albinfo.ch.