Epilepsia plotësisht e shërueshme, së paku te minjtë!

Testet e ardhshme do të tregojnë nëse kjo terapi gjenesh mund të funksionojë edhe te njerëzit

Një ekip shkencëtarësh University College London ia ka dalë që t`i zhdukë sulmet epileptike pa shkaktuar me këtë rast efekte anësore. Natyrisht, këtë e kanë arritur te minjtë, në trurin e të cilëve kanë vendosur një gjen special.

Për t`u hequr sulmet për disa javë rresht, dhe pa pasoja, ka mjaftuar vetëm një trajtim terapeutik gjenesh, thonë shkencëtarët britanikë në punimin e botuar në magazinën profesionale “Science Translational Meidicine”. Kopjet e gjeneve të vendosura në trurin e miut kanë shkaktuar një mbireagim  të qelizave trunore dhe me këtë kanë parandaluar sulmin epileptik.

Kjo metodë funksionon në rastet e epilepsisë e lindur por mund edhe të parandalojë sulmet e mundshme epileptike si ato që shkaktohen nga lëndimet e trurit.

Testet e ardhshme do të tregojnë nëse kjo terapi gjenesh mund të funksionojë edhe te njerëzit. Nëse do të ndodhte një gjë e tillë, atëherë kjo do të ishte një metodës shpëtimtare për rreth 50 milionë njerëz në botë që vuajnë nga epilepsia.