Me fshesë kundër minareve, shpallet i pafajshëm

Ka fshirë me fshesë 5 “minaret” prej kartoni të vendosura simbolikisht mbi një flamur të shtrirë në tokë dhe për këtë është paditur kryetari i organizatës së ekstremit të djathtë PNOS, Dominic Lüthard.

Një proces gjyqësor që ka përfunduar sot në Burgdorf të Bernës  e ka shpallur të pafajshëm këtë politikan. Ndërkaq, sipas akuzës, ai me këtë akt “me vullnet dhe me vetëdije të plotë” kishte imituar një pllakat zgjedhor të Frontit Nacional nga viti 1933. Duke bërë këtë veprim, në një manifestim kundër minareve, të zhvilluar në Langenthal në vitin 2010, Lüthard, thotë padia, ka shkelur ligjin kundër diskriminimit në bazë race.

Veç kësaj, ai, duke e përdorur fshesën, e ka barazuar një simbol religjioz si minarja me mbeturinat që duhet pastruar.

Krahas Lüthard-it, para trupit gjykues është paraqitur edhe kryetari i auto-partei.ch Willi Frommenwiller. Edhe ai akuzohej për komente dashakëqij në manifestimin e njëjtë, të mbajtur në Langenthal, dhe, njësoj, edhe ai është shpallur i pafajshëm nga gjyqi.