Rekord në Eurozonë: 18.5 milionë të papunë

Më shumë të papunë janë regjistruar në Spanjë me 25.8 përqind, ndërsa më së paku në Austri me 4.4 përqind

Numri i të papunëve në eurozonë ka mbërritur rekordin prej më shumë se 18 milionë.Në fakt, 18.5 milionë të papunë janë të regjistruar si të papunë në shtetet e kësaj zone, bën të ditur zyra statistikore e BE-së Eurostat me seli në Luksemburg.

Numrit të papunëve i janë shtuar 146 mijë më shumë se sa vitin e kaluar duke shkuar në 11.6 për qind nga 10.3 që ishte në 2011. 

Papunësia më e madhe është regjistruar në Spanjë me 25.8 përqind, ndërsa më e ulta në Austri me 4.4 përqind.

Në Spanjë dhe në Greqi, dy vendet e goditura më fort nga kriza financiare, më shumë se gjysma e fuqisë së punëtore nën 25 vjeç, aktualisht janë të papunë. 

Shifrat më të ulëta të papunësisë mes të rinjve u regjistruan në Gjermani, rreth 8 për qind, ndërsa 5.4 për qind është shifra e të papunëve në total. 

Vendet e Eurozonës po përpiqen të rimëkembin ekononinë e goditur nga kriza financiare, raporton TCH.

Në total, ekonomia e monedhës së përbashkët është në recesion. Ajo humbi terren me 0.2 përqind në 6-mujorin e parë të këtij viti.

Përvec Greqisë, edhe Italia dhe Spanja janë vende zyrtarisht në recesion, ndërsa ekonomia franceze po rimëkëmbet në 3-mujorshin e tretë të këtij viti.