Projektligji për paga vazhdon të kundërshtohet nga sindikatat e punëtorëve

Edhe Sindikata e Pavarur e Doganës së Kosovës ka reaguar ndaj iniciativës për kategorizimin e oficerëve doganorë në staf civil.

Kjo sindikatë vlerëson se kategorizimi i punonjësve të Doganës së Kosovës si shërbyes civilë, ndryshimi i statusit të zyrtarëve doganorë, organizimit të Doganës do të ketë efekt në rolin dhe misionin kompleks të Doganës në fushën e sigurisë kufitare, por edhe në mbledhjen e të hyrave, përcjell albinfo.ch.

“Duke pasur parasysh faktin që klasifikimi i paraqitur për pozitat doganore në aneks nuk përshtatet me statusin, përgjegjësitë, kompleksitetin, rrethanat dhe kushtet në të cilat punojnë zyrtarët doganorë”, thuhet në reagim. Sindikata e Doganave ka kërkuar nga ministri i Administratës Publike të ketë parasysh propozimet e tyre që është: statusin e veçantë të zyrtarëve doganorë, të ruhen dhe avancohet pagat e zyrtarëve doganorë, duke u bazuar në statusin e specifikat doganore si dhe të mos finalizohet pa i pasur parasysh vërejtjet, komentet dhe propozimet dhe pa i integruar ato në të.

Edhe Sindikata e Bashkuar e Arsimit ditë më parë ka kundërshtuar këtë projektligj, duke thënë se nëse miratohet si i tillë, do t’ua humbte dinjitetin mësimdhënësve.