Qeveria e Kosovës dënon sulmet ndaj pjesëtarëve serbë të FSK-së

Disa ditë më parë por edhe disa javë më parë  janë shënuar disa sulme mbi pronat e pjesëtarëve serbë të Forcës së Sigurisë së Kosovës.

Qeveria e Kosovës, i ka dënuar sulmet ndaj pjesëtarëve ser btë FSK-së.

Lista Srpska ka paralajmëruar konsultime me presidentin e Serbisë, Aleksandër Vuçiq.

“Qeveria e Republikës së Kosovës është e shqetësuar dhe dënon incidentet e fundit që kanë motive ndëretnike dhe të cilat ndikojnë negativisht në marrëdhëniet ndërmjet komuniteteve në Kosovë. Qeveria e Kosovës kërkon nga organet kompetente që sa më shpejt të ndriçojnë arsyet dhe motivet e këtyre rasteve të ulëta dhe autorët e tyre të dalin përpara drejtësisë. Rastet e tilla kanë për synim të pengojnë përpjekjet e institucioneve për ndërtimin e një shoqërie demokratike e gjithëpërfshirëse”, thuhet në reagimin e qeverisë së Kosovës.

Sulmi i fundit ndodhi në fillim të kësaj jave në fshatin Zupç të Komunës së Zubin Potokut në veri të Kosovës, pjesë kjo e banuar me shumicë serbe.

Një pjesëtari serb të FSK-së iu dogj vetura.

Këto sulme gjatë këtyre kohëve në Prishtinë interpretoheshin si një formë e presionit për të penguar përfshirjen e serbëve në Forcën e Sigurisë së Kosovës. Policia thotë se rastet janë në hetim, por akoma nuk i di autorët e sulmeve që duken të koordinuara.