Vetëvendosje prezanton planin për bisedimet me Serbinë 

Kurti: “Kosova duhet të ketë parasysh të realizojë një dialog të hapur brenda shoqërisë, i cili duhet të nisë nga poshtë"

Vetëvendosje ka prezantuar planin e saj 4+1 rreth bisedimeve për normalizimin e marrëdhënieve me Serbinë.

Kreu i saj, Albin Kurti, ka thënë se nuk mund të ketë fazë  finale të dialogut pa u bërë bilanci shtetëror i dialogut të zhvilluar më parë. Ai ka thënë se si pikë e dytë e platformës së kësaj partie është se: “Kosova duhet të ketë parasysh të realizojë një dialog të hapur brenda shoqërisë, i cili duhet të nisë nga poshtë. Në  pikën e tretë Vetëvendosje thotë se duhet të ekzistojë një dialog me BE-në, që do të qartësonte dialogun me Serbinë, e jo të thuhet se herë është dialog teknik e herë politik, ndërkaq pika e 4-t është pajtimi institucional, që të mos ketë asnjë shmangie nga prioritetet e drejtësisë”, ka thënë ai.

Kurti ka theksuar se si udhëheqës për pajtimin shoqëror nuk mund të jenë Hashim Thaçi e Edita Tahiri, të cilët i ka fajësuar se dialogut mund t’ia japin një çerek finale, por jo finale të madhe. Vetëvendosje ka kërkuar mbështetjen e të gjithë deputetëve dhe qytetarëve për ta jetësuar këtë plan.

Kurti ka folur edhe për mundësinë e rrëzimit të Qeverisë Haradinaj, për çka mendon se kryeministri nuk ka qenë asnjëherë i tillë, pos që e ka ushtruar atë pozitë.