Azili, shkas për mospajtime në mes të dhomave të parlamentit

Dhoma e kantoneve mbron qëndrimin se azilkërkuesve duhet edhe më tej t`u jepen ndihmat sociale dhe jo vetëm ato emergjente

Dhoma e kantoneve e Parlamentit të Zvicrës ka kundërshtuar dhomën nacionale të këtij parlamenti, sa i takon ndihmave emergjente për azilkërkuesit. Ajo mbron qëndrimin se azilkërkuesve duhet edhe më tej t`u jepen ndihmat sociale dhe jo vetëm ato emergjente.

Mirëpo, këto ndihma sociale duhet të jenë dukshëm më të ulëta se ato që u jepen përfituesve tjerë të ndihmave sociale në Zvicër.

Ndërkaq në disa pika të tjera dhoma e kantoneve pajtohet me atë nacionale. Ndër këto pika është ajo se në të ardhmen dezertorët nga shërbimi ushtarak nuk do të kenë të fitojnë azilin në Zvicër. Po ashtu pajtim është arritur edhe në atë se duhen hapur qendra speciale për azilkërkuesit me prirje delinkuente.

Një pikë tjetër për të cilën të dyja dhomat kanë mendim të njëjtë është që federata të ketë të drejtë të vendosë për ndërrimin e destinimit të ndërtesave të veta për t`i përdorur ato për strehimin e azilkërkuesve, edhe pa marrë pëlqimin e kantoneve.