Varone nuk i përgjigjet gjykatës turke!

Në rast të një gjykimi, Varone mund të dënohet me burg deri në 5 vjet

Shefi i policisë së Kantonit të Valisit, Christian Varone, nuk do të paraqitet para Gjykatës kompetente turke për t`u marrë në pyetje lidhur me deliktin e kryer në muajin korrik në Turqi. Siç bën të ditur avokati i tij Philippe Loretan për mediet zvicerane, klienti i tij do të injorojë marrjen në pyetje që gjykata turke e ka caktuar për 25 shtator. Avokati thotë se Varone nuk ka pasur ftesë zyrtare për tu paraqitur. Në rast të një gjykimi, Varone mund të dënohet me burg deri në 5 vjet.Christian Varone qe kapur më 27 nkorrik në aeroportin e Antalia-s me një gur me vlera arkeologjike, që e kishte fshehur në valixhe. Ai ishte liruar nga arresti me detyrimin për t`u paraqitur në gjykimin që do të pasonte. Lidhur me gurin problematik, Varone ishte shprehur se nuk e kishte ditur se ai kishte vlera arkeologjike dhe i takonte gërmadhave të qytetit antik në afërsi të Antalias. “Unë kisha menduar se një gur me vlera arkeologjike duhej të ishte në muze dhe jo në skaj të rrugës”, kishte thënë ai.