Shumica kundër blerjes së aeroplanëve luftarakë

57.1 për qind të zviceranëve me të drejtë vote konsiderojnë se Zvicra nuk ka nevojë për aeroplanë të rinj luftarakë. Ndërsa kundër blerjes tashmë të kontraktuar të aeroplanëve luftarakë suedezë “Gripen”, në një sondazh reprezentativ të bërë nga Instituti Isopublic me porosi të gazetës “Sonntagszeitung” janë shprehur  64.4% të tyre.

Në favor të blerjes së aeroplanëve të përmendur janë shprehur vetëm 25.6 për qind të të anketuarve ndërsa 10% të tyre nuk kanë pasur mendim rreth kësaj.

42.1 % të pjesëmarrësve në këtë sondazh janë të mendimit se Zvicra ka nevojë që të blejë aeroplanë të rinj luftarakë. Nga kjo përqindje vetëm 18.3% janë të sigurt për këtë ndërsa 23.8% anojnë kah po-ja.  Ndërsa kategorikisht kundër blerjes janë 27.8% dhe më shumë kundër se për, janë 29.3%.

Në anketë kanë marrë pjesë 1000 persona me të drejtë vote nga Zvicra gjermane dhe ajo franceze. Anketa është zhvilluar nga 31 gushti deri më 2 shtator.

Në dhjetor të vitit 2011 në një sondazh të bërë nga Demoscope 64 për qind kanë qenë kundër blerjes së aeroplanëve të rinj luftarakë, 26 për qind pro kësaj dhe 10% të pavendosur.