Dënohet mësuesi – kishte abuzuar me nxënësen e mitur

Ai ka marrë një dënim me heqje lirie pjesërisht të kushtëzuar, prej tri vitesh, nga të cilat një vit duhet ta kalojë në burg

Një mësues nga kantoni i Argaut është dënuar për veprime të palejueshme seksuale me një nxënëse të tij nën moshën 16 vjeçare. Trupi gjykues i ka shqiptuar atij një dënim me heqje lirie pjesërisht të kushtëzuar, prej tri vitesh, nga të cilat një vit duhet ta kalojë në burg.

Megjithë këtë, për mungesë provash, ish mësuesi nga Aargau është liruar nga pjesa e akuzave që e ngarkonin atë për përdhunim të shumëfishtë dhe për detyrim seksual.

Një rrethanë tjetër lehtësuese për mësuesin ka qenë ajo se ai është dashur të priste rreth gjashtë vite zhvillimin e procesit gjyqësor. Kjo kohë, kur ai nuk ka mundur të punonte dhe jetonte i distancuar nga rrethi shoqëror, sipas gjykatës është konsideruar si vuajtje dënimi në vete.