Haradinaj takon zv.ministrat, disa ankohen për mos përfillje nga ministrat

Pas fjalës së Haradinajt, zëvendësministri i Jashtëm, Gjergj Dedaj, ka shprehur pakënaqësi për trajtimin që i bëhet atij nga ministri i Jashtëm Behgjet Pacolli

Kryeministri i Kosovës, Ramush Haradinaj, ka takuar zëvendësministrat për të diskutuar për raportet e tyre të punës.

Haradinaj ka kërkuar që përveç aktiviteteve të pasqyruara, në raportet e punës së zëvendësministrave duhet të përfshihen edhe efektet e punës së tyre.

Në fjalën hyrëse, Haradinaj ka kërkuar që raporti i ardhshëm i punës së zëvendësministrave të bëhet pas 6 muajsh, përcjell albinfo.ch.

“Kjo është një dëshmi që secili e ndien peshën e përgjegjësisë, ju e dini që keni përgjegjësi ligjore dhe kushtetuese. Raportet janë një raportim i aktiviteteve tuaja, këto janë dinamikat e juaja, kjo është dëshmi që ju keni hy në punë, jeni në temën tuaj. Ka pasur seriozitet nga të gjithë. Na nevojitet aktivitet dhe angazhim se çka janë rezultatet e punës tonë si zv.ministra”, ka thënë ai.

Pas fjalës së Haradinajt, zëvendësministri i Jashtëm, Gjergj Dedaj, ka shprehur pakënaqësi për trajtimin që i bëhet atij nga ministri i Jashtëm Behgjet Pacolli.

“Kam vërejtje në komunikim me ministrin. Nuk e di zyrën e ministrit tim dhe jam në pozitë të vështirë çdo mëngjes. Kam heshtur për hir të zhvillimeve që kanë ndodhur”, ka thënë ai.

Me të marrë fjalën zëvendësministri Dedaj, mediat janë larguar nga ky takim. Qeveria Haradinaj numëron mbi 70 zëvendësministra.