Diplomati kosovar s’ka buxhet për qira, strehohet te familjarët

Konsullata e Përgjithshme e Kosovës në Nju Jork të SHBA-së është zhytur në “fukarallëk”.

Që disa muaj ka mbetur pa para në xhirollogari duke mos arritur ta paguajë as qiranë e banimit për diplomatët dhe familjarët e tyre.

Për situatën e rëndë me financa është njoftuar edhe ministri Behgjet Pacolli përmes një komunikimi elektronik të cilin ka arritur ta sigurojë gazeta.

Aty shefja e Konsullatës, Teuta Sahatçiu, tregon për vështirësitë me të cilat është përballur diplomati Lulzim Krasniqi, me të zbarkuar në Nju Jork.

Ai është shtrënguar të strehohet tek familjarët e tij, pasi në mungesë të mjeteve financiare është dashur të largohej nga hoteli ku ishte vendosur përkohësisht, shkruan “Koha Ditore”.

Sahatçiu në letër fillimisht e njofton kreun e MPJ-së se diplomati i ri, i caktuar të shërbejë në Konsullatën në Nju Jork, tashmë ka arritur dhe po përgatitet të marrë përsipër detyrat që e presin, përcjell albinfo.ch.