Tërheq viktimën pas vete për 100 metra

Të premten në mbrëmje, një i ri 20-vjeçar, i dehur, e ka goditur me veturë një këmbësor për vdekje, duke e tërhequr pas vetes

Një shofer i dehur, 20-vjeçar, e ka goditur një kalimtar në Brienz të Oberland të Bernës.

Kalimtari ka mbetur i vdekur në vend, pasi që vozitësi e ka goditur dhe e ka tërhequr pas vetes për rreth 100 metra.

Viktima ishte duke ecur në skaj të një rruge sekondare me një grup prej shtatë personash. Pasi që ka shkaktuar aksidentin, i riu ka ikur duke e tërhequr zvarrë të ndjerin, i cili, në fund të një kthese është shkoqur nga vetura.

Me të arritur ndihma e shpejtë vetëm sa e ka konstatuar vdekjen e të aksidentuarit.

Shoqëruesit e viktimës kanë arritur ta lokalizojnë veturën e implikuar në aksident. Organet e rendit e kanë identifikuar vozitësin, të cilin e kanë arrestuar në shtëpinë e tij.

Fajtori i dyshuar, edhe katër orë pas aksidentit, kishte një përqindje alkooli në gjak prej 1.6 pro mil.