Ende asnjë gjurmë për policët e zhdukur, vazhdojnë kërkimet

Kërkimet për dy policët e zhdukur, Malsor Dashi dhe Armend Trena, të cilët me veturën e tyre mendohet se kanë pësuar aksident dhe kanë rënë në lumin Lepenc, do të vazhdojnë edhe sot.

Deri tani nuk është gjetur asnjë gjurmë, ndërsa policia nuk ka dhënë detaje, duke thënë se është ende herët të flitet për rastin.

Operacioni i kërkimit dje ka nisur nga e para, ndërsa përveç në lumin Lepenc, kërkimet janë zgjeruar edhe në male.

Po ashtu policia ka ndaluar punimet në ndërtimin e autostradës për Shkup që po bëheshin afër kësaj zone. Një ditë më parë rreth 170 persona nga të gjitha institucionet e vendit u angazhuan për të kërkuar për policët, por pa sukses. Kryeministri i Kosovës, Ramush Haradinaj ka thënë se ende nuk ka bërë një kërkesë zyrtare në shtetin e Maqedonisë, pasi po pret që fillimisht të përfundojnë kërkimet në vend.