Rrezikohen 50 mijë vende pune nëpër bankat e Zvicrës

Dy top bankierët zviceranë në një prononcim për “SonntagsBlick” janë shprehur pesimistë për të ardhmen e sektorit bankar në Zvicër.

Sektori bankar është mbërthyer në krizën më të keqe që prej vitesh. Një gjendje e tillë nuk do të ndryshojë shpejt, tha Osvald Grübel, shef i mëhershëm i bankës Credit Suisse, ndërsa më vonë edhe i UBS-it.

“Rimëkëmbja do të marrë pesë vjet, ndoshta edhe dhjetë”, tha Gruebel për “SonntagsBlick”.

Në gjithë botën banka UBS në dymbëdhjetë muajt e fundi kishte reduktuar 7210 vende pune, ndërsa Credit Suisse 2058.

Më shumë se 1.6 milionë vende pune janë rrezikuar në dymbëdhjetë bankat më të mëdha të botës që nga viti 2008.

Politikani i SVP-së dhe bankieri Matter Thomas ka përshëndetur zvogëlimin e pagave në sektorin bankar të investimeve.

Kryetari i Bankës Helvetike, e themeluar në vitin 2011, thotë se nuk është i rrezikuar vetëm sektori bankar i investimeve (Investment Banking).

“Nëse vazhdohet me sekretet bankare, atëherë do të vijë një reduktim dramatik i vendeve të punës”, thotë Thomas për “SonntagsBlick”.

“Mund të jenë në rrezik deri në 50 mijë vende pune gjatë viteve në vijim”, tha Matter Thomas.