Bashkatdhetari nga Zvicra dhuron 30 kompjuterë në Komunën e Klinës

Kryetari i Komunës së Klinës, Zenun Elezaj ka pritur bashkatdhetarin dhe veprimtarin, Besnik Ademi, nga fshati Poterq i Lartë të kësaj komune, me punë të përkohshme në Luzern të Zvicrës.

Siç njofton Komuna e Klinës, veprimtari dhe humanisti Ademi, ka informuar kryetarin e Komunës se për tri shkolla të kësaj komune, shkollën e Zllakuqanit, të Jagodës dhe të Poterqit ka sjelle 30 kompjuterë, me qëllim të pajisjes së kabineteve të teknologjisë informative të këtyre shkollave, përcjell albinfo.ch.

Kryetari Elezaj ka falënderuar humanistin Ademi dhe është shprehur se kontributi i komunitetit tonë në diasporë nuk ka munguar asnjëherë, po ashtu nuk po mungon edhe sot.

Ademi kërkoi nga kryetari Elezaj që shkollat e kësaj komune t’i shohin prioritetet dhe premtoi se është në gjendje të sjellë edhe 30 kompjuterë.