Thaçi e Haradinaj: Dita e Kushtetutës, ndër datat më të rëndësishme

Në dhjetëvjetorin e Kushtetutës së Kosovës, presidenti Hashim Thaçi ka thënë se Kushtetuta e Kosovës pasqyron përpjekjet shekullore për liri, ashtu si edhe vendosmërinë për të ndërtuar një të ardhme në paqe të qëndrueshme.

“Asnjëherë nuk do të ndalemi së punuari për të forcuar shtetin, duke respektuar të drejtat e liritë e çdo qytetari dhe duke garantuar barazinë e tyre para ligjit”, ka thënë presidenti Thaçi, përcjell albinfo.ch.

Ndërsa kryeministri Ramush Haradinaj ka uruar qytetarët, duke thënë se pas çlirimit dhe pavarësisë, Dita e Kushtetutës është ndër datat më të rëndësishme për vendin.

“Më 9 prill të vitit 2008 Kosova vendosi themelet e saj të konsolidimit si shtet, duke e funksionalizuar aktin më të lartë juridik, Kushtetutën e saj”, ka thënë Haradinaj. Ai ka thënë se dekada e parë e Kushtetutës së vendit ka përjetuar edhe sfida, duke shtuar se ato sfida tregojnë edhe vlerat demokratike si shoqëri.