Me barkë në shkollë

Prindërit e këtyre nxënësve dhe arsimtarët e shkollës thonë se udhëtimi për në shkollë përmes liqenit, ua rrezikon jetën këtyre fëmijëve

Për çdo ditë, Blerim Ibrahimi nga fshati Orllan i Podujevës, shkon në shkollë me barkë.

Ai dhe rreth 20 nxënës të tjerë zgjedhin të kalojnë liqenin e Batllavës për të shkuar në shkollë, pasi rruga është e gjatë dhe e paasfaltuar. Barkat që përdorin, janë shumë të vjetra dhe rrezikojnë jetët e tyre. Megjithatë, ata nuk mungojnë në shkollë, raporton “Radio Evropa e Lirë”.

Blerim Ibrahimi që tani është në klasën e nëntë, thotë se këtë rrugë e bën që nga klasa e dytë.

“Vështirë e kam shumë. Verë-dimër kështu nëpër ujë. Kur ngrihet liqeni, duhet të shkojmë rrethit. Rruga është shumë e gjatë, i ka 8 kilometra. Nganjëherë i vetëm kaloj nëpër ujë”, thotë Blerim Ibrahimi, përcjell albinfo.ch.

“Në klasë të dytë kam mësuar të drejtoj anijen dhe kam dalë vetë”, tregon ai. Prindërit e këtyre nxënësve dhe arsimtarët e shkollës thonë se udhëtimi për në shkollë përmes liqenit, ua rrezikon jetën këtyre fëmijëve.

Adem Munishi, një banor i fshatit apelon tek autoritete lokale dhe ato qendrore të ndërmarrin masa dhe të shtrojnë rrugën, ngase kalimi i liqenit paraqet rrezik të madh.

“Është thyer akulli, kanë rënë njerëzit, kanë rënë disa prej atyre familjeve, tre katër veta kanë rënë (në ujë), falë njerëzve të vullnetit të mirë i kanë nxjerrë, por edhe ata e kanë pasur jetën në rrezik. Unë kërkoj nga Komuna e Podujevës, nga Qeveria e Kosovës, sa është e mundshme edhe sa më shpejt të rregullohet kjo rrugë dhe të bëhet një zgjidhje për fëmijët tanë”, thekson Munishi.

Edhe Shaban Neziri, arsimtar i shkollës “Zahir Pajaziti” në fshatin Orllan thotë se lundrimi apo ecja mbi akull e nxënësve për të shkuar në shkollë paraqet një rrezik të përhershëm për fëmijët.

Ka një kohë të gjatë që është premtuar rregullimi i rrugës, në mënyrë që nxënësit të mund të shkojnë me autobus në shkollë, mirëpo ende nuk është ndërmarrë asgjë.

Në Komunën e Podujevës, zëdhënësi Nazmi Elezi thotë se këtë vit do të fillojë asfaltimi i kësaj rruge që do të zgjasë 2 vjet dhe do të kushtojë 455 mijë euro.

Nxënësit e shkollës “Zahir Pajaziti” në Orllan e kalojnë liqenin për të shkuar në shkollë edhe gjatë stinës së dimrit, kur uji aty ngrihet dhe detyrohen të ecin mbi akull.

Ata shpresojnë që ky të jetë viti i fundit që rrezikojnë jetën e tyre për të shkuar në shkollë.