Hoti thotë se seanca për turqit e dëbuar mbahet nesër 

Sipas Hotit, seanca e sotme nuk është mbajtur sepse Kryesia e Kuvendit nuk është mbledhur për shqyrtim të kësaj kërkese

Shefi i Grupit Parlamentar të LDK-së, Avdullah Hoti, ka bërë të ditur se është bërë kërkesë që seanca e jashtëzakonshme e Kuvendit, që ishte paraparë për sot në orën 11:00 lidhur me rastin e arrestimit dhe deportimit të shtetasve turq, të mbahet nesër në orën 14:00. Sipas Hotit, seanca e sotme nuk është mbajtur sepse Kryesia e Kuvendit nuk është mbledhur për shqyrtim të kësaj kërkese.

Grupi Parlamentar i LDK-së po ashtu ka kërkuar hetim për shpenzimet pa bazë ligjore për lobimin.“Janë shpenzuar shuma të mëdha të buxhetit për interesa personale, letra e Geoffrey Nice drejtuar qeverisë tregon qartë për terma financiarë të dakorduar jashtë rrugëve formale si dhe përmend shërbimet që janë kryer, përfshirë edhe aranzhimin e ligjëratave për Thaçin dhe Hoxhajn.

Letra gjithashtu përmend edhe kërkesën e Thaçit për të ndihmuar autorët e biografisë së tij,” ka thënë Hoti.