Media zvicerane: Kosova ka problem korrupcionin, tendenca destabilizuese nga Rusia dhe Turqia

Pas prestigjiozes austriake “Der Standard” edhe televizioni zviceran “Srf”, shkruan se Kosova pas demarkacionit ka akoma procedurë për liberalizimin e vizave, njofton albinfo.ch.

“Për liberalizimin e vizave, pas demarkacionit vjen lufta kundër korrupcionit,” shkruan fillimisht në media zvicerane. “Demarkacioni nuk kaloi pa presion. Për politikanët nacionalistë në Prishtinë çdo kilometër katror nëpër male, ishte më e vlefshme se çdo gjë tjetër, edhepse në kufi më Malin e Zi gjatë verës qëndrojnë më së shumti disa duzina dhi dhe dele.”

Tendenca destabilizimi nga Rusia dhe Turqia

Presioni i shtuar njëherë erdhi nga BE, e cila e ka nuhatur që duhet të jetë më aktive në Ballkan, për të neutralizuar tendencat destabilizuese nga Rusia dhe Turqia. Akoma më shumë presione kanë ardhur edhe nga diplomatët amerikanë, të cilët kanë qëllime të njëjta mbi Ballkanin.

Por pyetja që parashtron media zvicerane, është se sa kohë i duhet popullatës kosovare deri te liberalizimi i vizave me zonën Shengen. Në kushtet e liberalizimit të vizave Kosova duhet të qëndrojë aktive kundër korrupcionit të tejhapur. “Bile kjo është arsyeja kryesore se pse vendi nuk del nga varfëria dhe papunësia e lartë.”

Sa shpejt do vendosë BE?

Në fund srf.ch tregon dy mundësitë e BE.

“Nëse BE vendos menjëherë për liberalizimin e vizave, atëherë u jep të drejtë nacionalistëve të majtë për hedhjen e gazit lostjellës. Ata pretendonin se qeveria kërkon ratifikimin e vijës kufitare, duke i dhuruar një pjesë të malit Podgoricës, për të mos bërë asgjë kundër bizneseve të tyre të pista.

Por nëse BE tejzgjat liberalizimin e vizave, atëherë zhgënjen të rinjtë kosovarë, të cilët ndjehen të izoluar dhe kjo do prodhonte skepticizëm potencial ndaj BE.”