Euro vazhdon të bie

Më i dobët në nëntë vitet e fundit

Ilustrim

Euro vazhdon të bie në Shqipëri, duke regjistruar shifra rekord të ulëta. Sipas kursit zyrtar të Bankës së Shqipërisë, një euro këmbehej me 131.83 lekë, rreth 0.07 lekë më pak se fundi javës së kaluar. Euro po luhatet në nivelet më të ulëta të nëntë viteve të fundit.

Akterët kryesorë të tregut tregojnë se monedha e përbashkët evropiane ka tendencë që të humbasë pikë përkundrejt lekut me afrimin e datës së pagesave nga biznesi, shkruajnë mediat shqiptare.

Ata argumentojnë se më afrimin e datës 14, e cila është edhe afati i fundit i pagesës së Tatimit mbi Vlerën e Shtuar, euro dobësohet duke qenë se bizneset po thyejnë valutën për të mbyllur detyrimet. Sipas ekspertëve euro do të jetë e dobët deri me datë 20, afati i fundit për pagimin e sigurimeve, përcjell albinfo.ch.

Ekspertët presin që me afrimin e efekteve sezonale, ardhja e turistëve të huaj dhe fluksi i emigrantëve, euro do të nënçmohet edhe më tej, pavarësisht ecurisë në tregjet ndërkombëtarë.

Megjithatë, monedha e përbashkët evropiane ka ruajtur qëndrueshmërinë e saj në tregjet evropiane. Sipas “Financial Times” euro këmbehej me 1.231 dollarë, 0.02 më pak se niveli më i lartë i tre viteve të fundit.

Një dollar është këmbyer me 107.02 lekë, rreth 0.16 lekë më pak se të premten sipas kursit zyrtar të Bankës së Shqipërisë. Dollari po luhatet në nivelet më të ulëta që nga 2008-a duke reflektuar edhe nivelin e dobët të monedhës së gjelbër në tregjet ndërkombëtare.