Qeveria maqedonase fton mërgimtarët për të investuar

Qeveria do të kërkojë mënyrë për t’i motivuar mërgimtarët të investojnë në Maqedoni.

Përveç që do të mund t’i shfrytëzojnë mjetet e parapara me Propozim-ligjin për mbështetje financiare në investime, planifikohet motivim shtesë, i cili si modalitet, do të futej ose në atë pjesë të ligjit ose në Planin për rritje ekonomike, shkruajnë mediat shqiptare të Maqedonisë.

“Po punojmë në atë, si të realizohet mbështetja edhe për qytetarët të cilët punojnë jashtë vendit. Dëshirojmë t’i motivojmë të kthehen në Maqedoni dhe këtu të hapin biznese”, deklaroi ministri i Ekonomisë, Kreshnik Bekteshi pas takimit me anëtaret e Odës ekonomike të Maqedonisë veriperëndimore (OEMVP), përcjell albinfo.ch.

Kryetari i OEMVP-së, Nebi Hoxha, theksoi se është e rëndësishme që plani për rritje ekonomike të realizohet në mënyrë transparente dhe të formohet organ që do ta ndjekë realizimin e mbështetjes dhe të vendosen sanksione për parregullsitë e mundshme.

Bekteshi dhe Hoxha njëherit u bënë thirrje deputetëve që sa më parë të miratojnë ligjin, në mënyrë që kompanitë të mund t’i marrin subvencionet.